کمپیوٹر سائنس وآئی ٹی گریجویٹس کے لیے سنٹرلائزڈ ٹیسٹ میں رجسٹریشن کی تاریخ 3 میں جنوری تک توسیع

اسلام آباد۔29دسمبر (اے پی پی):ہائر ایجوکیشن کمیشن (ایچ ای سی) نے کمپیوٹر سائنس اور آئی ٹی گریجویٹس کے لیے منعقد ہونے والے سنٹرلائزڈ ٹیسٹ میں رجسٹریشن کے لیے آخری تاریخ میں 3 جنوری 2024 تک توسیع کر دی ہے تاہم ٹیسٹ کی تاریخ یعنی 7 جنوری 2024 برقرار رہے گی۔

تسلیم شدہ پبلک اور پرائیویٹ سیکٹر یونیورسٹیوں اور الحاق شدہ /حلقہ کالجوں میں پیش کردہ کمپیوٹر سائنس/آئی ٹی سے متعلقہ مضامین کے ساتویں سمسٹر میں داخلہ لینے والے طلباء کو ورچوئل یونیورسٹی کے لنک https://www.vu.edu.pk/GraduateTest/ کے ذریعے رجسٹر کرنےکے لیے حوصلہ افزائی کی جاتی ہے۔رجسٹریشن کی آخری تاریخ میں توسیع کا فیصلہ تمام سرکاری اور نجی شعبے کے اعلیٰ تعلیمی اداروں کے وائس چانسلرز/ریکٹرز اور شعبہ جات کے سربراہوں کی ایک ورچوئل میٹنگ میں کیا گیا تاکہ اس بات کو یقینی بنایا جا سکے کہ زیادہ سے زیادہ اہل طلباء اپنی رجسٹریشن کرائیں، مضمون کا امتحان دیں اور اس موقع سے فائدہ اٹھائیں۔

چیئرمین ایچ ای سی نے یونیورسٹیوں خصوصاً آئی ٹی اور کمپیوٹر سائنس کے شعبوں کو مشورہ دیا کہ وہ ساتویں سمسٹر کے طلباء کی رجسٹریشن اور ٹیسٹ میں شرکت کو یقینی بنائیں۔ انہوں نے اعلیٰ تعلیمی اداروں پر زور دیا کہ وہ اپنے فوکل پرسنز کی نامزدگی میں تیزی لائیں تاکہ ٹیسٹ کے تمام پہلوئوں کے حوالے سے ہموار رابطے ہوں۔ انہوں نے کہا کہ اس اقدام کا بنیادی مقصد اس بات کو یقینی بنانا ہے کہ آئی ٹی گریجویٹس ضروری مہارتوں اور علم سے لیس ہوں تاکہ وہ بدلتی ہوئی آئی ٹی انڈسٹری میں بہترین کارکردگی کا مظاہرہ کریں۔

انہوں نے مزید کہا کہ یہ ٹیسٹ ہمیں نئے آئی ٹی گریجویٹس میں تعلیمی اور تربیتی خلا کی نشاندہی کرنے کے قابل بنائے گا جنہیں مارکیٹ کی ضروریات کے مطابق خصوصی ماڈیولز، اپرنٹس شپ یا بوٹ کیمپس کے ذریعے حل کیا جا سکتا ہے۔ہائر ایجوکیشن کمیشن اور متعلقہ سٹیک ہولڈرز کا مقصد انفارمیشن ٹیکنالوجی کی صنعت اور تعلیمی میدان میں خلا کو پر کرنا اور انفارمیشن ٹیکنالوجی کے طلباء کی مارکیٹ کے لیے تیاری کو بہتر بنانے کے طریقے متعارف کروانا ہے۔

ٹیسٹ میں کوالیفائی کرنے والے طلباء کو انفارمیشن ٹیکنالوجی کمپنیوں میں جگہ کی پیشکش کی جائے گی تاکہ وہ حقیقی وقت کے منصوبوں پر تجربہ حاصل کر سکیں۔ کوالیفائنگ امیدواروں کو آٹھویں سمسٹر میں کریڈٹ اوقات کی چھوٹ پر بھی غور کیا جائے گا۔ موسم بہار 2024 انڈسٹری پلیسمنٹ پروگرام کا پہلا سیشن ہوگا۔ پروگرام کی کامیابی سے تکمیل کے بعد امیدواروں کی اسناد کو سفارشات کے ساتھ مختلف اہم پورٹلز پر انفارمیشن ٹیکنالوجی کمپنیوں کی ملازمت کی پیشکشوں تک رسائی کے لیے رکھا جائے گا۔