اسلام آباد۔29دسمبر (اے پی پی):پاکستان نیشنل ہارٹ ایسوسی ایشن (پناہ)نے غیر متعدی بیماریوں سے ہونے والی اموات اور پیچیدگیوں کو کنٹرول کرنے کے لئے ملک بھر سے ماہرین صحت، سول سوسائٹی اور پالیسی سازوں پر مشتمل ایک تھنک ٹینک تشکیل دیا ہے تاکہ غیر متعدی بیماریوں میں کمی کے لیے دنیا کے آزمودہ جدید طریقوں سے رہنمائی لیتے ہوئے ایک موثر حکمت عملی تشکیل دی جا سکے۔جمعہ کو پناہ کی جانب سے جاری پریس ریلیز کے مطابق اس تھنک ٹینک کا تیسرا اجلاس پناہ کے صدر میجر جنرل (ر) مسعود الرحمن کیانی کی صدارت میں اسلام آباد کے ایک مقامی ہوٹل میں منعقد ہوا ۔شرکامیں تھنک ٹینک میں شامل ماہرین صحت، معیشت ، سول سوسائٹی، ذرائع ابلاغ اور متعلقہ وزارتوں کے نمائندے شامل تھے۔ اجلاس میں اس بات پر غور کیا گیا کہ کس طرح ملک میں غیر متعدی امراض میں کمی کے لیے ایک جامع حکمت عملی تشکیل دے کر بیماریوں اور اموات کو کم کیا جا سکتا ہے۔ انہوں نے کہا کہ حالیہ عرصے میں دل اور متعلقہ بیماریوں میں ہونے والا اضافہ تشویشناک ہے۔ ایسے میں پناہ کی ذمہ داریاں بڑھ جاتی ہیں کہ وہ عوام کو ان بیماریوں سے بچاؤ کے لیے دنیا کے آزمودہ اور موثر طریقوں پر عمل کریں۔پناہ نے ملک بھر سے ہر شعبے پر مشتمل ماہرین پر مشتمل یہ تھنک ٹینک تشکیل دیا ہے تاکہ بڑھتی ہوئی بیماریوں کے اس چیلنج سے نمٹا جا سکے۔ انہوں نے تھنک ٹینک ممبران سے کہا کہ آپ اپنے اپنے شعبے کے ماہر ہیں اور آپ کی جانب سے آنے والی تجاویز سے ہم زیادہ موثر طریقے سے ان بیماریوں کے خاتمے کے لیے کام کر سکیں گے۔ممبران کی طرف سے تجاویز آئیں کہ ہمارا فوکس علاج کی بجائے بیماریوں سے بچنے کے لیے احتیاطی تدابیر ہونا چاہیے۔اس کے لیے عوام میں ان بیماریوں سے بچاؤ کے طریقوں کے بارے میں معلومات کے ساتھ ساتھ پالیسی ایڈووکیسی کو بھی زیادہ موثر طریقے سے چلانا ہوگا تاکہ وہ عوامل جو ان بیماریوں کا باعث بنتے ہیں ان سے عوام کو بچایا جا سکے ۔ اس بات کا فیصلہ کیا گیا کہ اس تھنک ٹینک کے مزید ذیلی گروپس تشکیل دیئے جائیں گے جو اپنی اپنی تجاویز مرتب کریں گے اورآئندہ اجلاس میں اپنی تجاویزاراکین کے سامنے رکھیں گے اور غوروخوض کے بعد ان کی منظوری دی جائے گی ۔