اسلام آباد۔28دسمبر (اے پی پی):نیشنل ہائی ویز اینڈ موٹروے پولیس نے شدید دھند کے باعث رات گئے مرحلہ وار بند کئے گئے موٹروے ایم ون اور ایم ٹو کے حصوں کو صورتحال میں بہتری کے بعد ہر قسم کی ٹریفک کے لیے کھول دیا ہے ۔موٹر وے پولیس کے ترجمان کی طرف سے جمعرات کو جاری بیان کے مطابق موٹروے ایم 1کو دھند کی شدت میں کمی کے بعد علی الصبح پشاور سے رشکئی تک ہر قسم کی ٹریفک کے لیے کھول دیا گیا جبکہ ایم 2 اسلام آباد سے لاہور کی جانب جانے والی موٹروے ہر قسم کی ٹریفک کے لیے تا دیر بند رہی جسے اب کھول دیا گیا ہے۔ ترجمان موٹروے پولیس نے کہا کہ موٹروے بند کرنے کا مقصد حادثات سے بچائو اور موٹروے استعمال کرنے والوں کے جان و مال کا تحفظ ہے ۔ شہریوں سے درخواست ہے کہ دھند کہ اوقات میں غیرضروری سفر سے گریز کریں۔اپنا سفر دن کی روشنی میں مکمل کر کے دھند کے آغاز سے پہلے اپنی منزل مقصود تک پہنچ جائیں۔گاڑیوں میں فوگ لائٹس کا استعمال کریں اور تیز رفتاری سے گریز کریں اور اگلی گاڑی سے معمول سے زیادہ مناسب فاصلہ رکھیں۔ سفر شروع کرنے سے پہلے موٹروے پولیس کی ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکائونٹ سے تازہ ترین معلومات ضرور حاصل کر لیں تاکہ دوران سفر پریشانی سے بچا جا سکے ۔