انڈیا میں شادی پر من پسند کھانا نہ ملنے پر بارات واپس روانہ ہوگئی۔
این ڈی ٹی وی کے مطابق انڈین ریاست تلنگانہ کے شہر نظام آباد میں ایک شادی منسوخ کر دی گئی کیونکہ دولہا کا خاندان لڑکی والوں کی طرف سے پیش کیے جانے والے ’نان ویجیٹیرین‘ کھانوں سے ناخوش تھا۔
دولہے کے خاندان کا کہنا تھا کہ لڑکی والوں نے وعدہ کیا تھا کہ شادی کے کھانے میں مٹن ہوگا مگر کھانا کھلنے پر مینیو میں مٹن شامل نہ تھا۔ اس بات پر جھگڑا اتنا بڑھ گیا کہ بیچ بچاؤ کے لیے پولیس کو بلایا گیا۔
مقامی پولیس سٹیشن کے اہلکاروں نے دولہا کے خاندان کو لڑائی ختم کرنے کے لیے قائل کرنے کی کوشش کی لیکن ان کا مؤقف تھا کہ دلہن کے اہل خانہ نے جان بوجھ کر کھانے میں مٹن پیش نہیں کیا۔
دولہا کے خاندان کا مزید کہنا تھا کہ لڑکی والوں نے وعدہ خلافی کی ہے جس سے ان کی مہمانوں کے سامنے توہین ہوئی، اس لیے وہ یہ رشتہ قائم نہیں رکھ سکتے۔
دلہن کا تعلق انڈین شہر نظام آباد جبکہ دولہا جگتیال سے تعلق رکھتا تھا۔ نومبر میں دلہن کی رہائش گاہ پر دونوں کی منگنی ہوئی تھی۔