موٹروے ایم ون دُھند کی شدت میں کمی کے بعد صوابی سےبرہان تک ہر قسم کی ٹریفک کے لیے کھول دی گئی

اسلام آباد۔27دسمبر (اے پی پی):موٹروے ایم ون دُھند کی شدت میں کمی کے بعد صوابی سےبرہان تک ہر قسم کی ٹریفک کے لیے کھول دی گئی ہے ، ایم ون پشاور سے رشکئ جبکہ ایم 2 موٹروے للہ سے کوٹ مومن تک تا حال ہر قسم کی ٹریفک کے لیے بند ہے ۔

ترجمان موٹروے پولیس نے بتایا کہ موٹروے بند کرنے کا مقصد حادثات سے بچاؤ اور موٹروے استعمال کرنے والوں کی جان و مال کی حفاظت ہے ۔ شہریوں سے درخواست ہے کہ دھند کہ اوقات میں غیر ضروری سفر سے گریز کریں، اپنا سفر دن کی روشنی میں مکمل کر کے دھند کے آغاز سے پہلے اپنی منزل مقصود تک پہنچ جائیں ۔

ترجمان نے کہا کہ گاڑیوں میں فوگ لائٹس کا استعمال ،تیز رفتاری سے پرہیز اور اگلی گاڑی سے فاصلہ معمول سے زیادہ رکھیں۔ سفر شروع کرنے سے پہلے موٹروے پولیس ہیلپ لائن 130 سے معلومات حاصل کی جا سکتی ہیں ۔ اس کے علاوہ نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات حاصل کی جا سکتی ہیں ۔