افغانستان کرکٹ بورڈ نے اپنے ذاتی مفادات کو ترجیح دینے پر تین کھلاڑیوں کیخلاف ایکشن لے لیا۔
بورڈ نے مجیب الرحمان، فضل الحق فاروقی اور نوین الحق کو ایک سال تک سینٹرل کنٹریکٹ نہ دینے کا فیصلہ کرتے ہوئے اگلے دو سال تک لیگ کرکٹ کیلئے این او سی جاری نہ کرنے کا اعلان کر دیا ہے ۔
بتایا گیا ہے کہ تینوں کھلاڑیوں نے کرکٹ بورڈ سے مطالبہ کیا کہ انہیں جنوری 2024 کے سینٹرل کنٹریکٹ سے آزاد کرکے فرنچائز ٹورنامنٹ کیلئے این او سی جاری کیا جائے ، کھلاڑیوں کے غیر ذمہ دارانہ رویے کو سامنے رکھتے ہوئے بورڈ نے تینوں کیخلاف ایکشن لینے کا فیصلہ کیا۔
افغان کرکٹ بورڈ نے سلمان بٹ کو بیٹنگ کنسلٹنٹ بنانے کی خواہش ظاہر کردی
بورڈ نے کہا کہ تینوں کھلاڑی سینٹرل کنٹریکٹ پر دستخط سے انکار ی رہے کیونکہ وہ خود کو لیگ کرکٹ میں مصروف رکھنا چاہتے تھے ، جس کا مطلب یہ ہے کہ انہوں نے ملکی کرکٹ کے مفاد کی بجائے اپنے ذاتی مفاد کو ترجیح دی۔ جس پر بورڈ کی تشکیل کردہ کمیٹی نے تحقیقات کے بعد کھلاڑیوں کی سزائیں تجویز کیں۔