لاہور میں مصنوعی بارش، ’پاکستان کی ہر ممکن مدد اپنا فرض سمجھتے ہیں‘

پاکستان کے صوبہ پنجاب کے دارالحکومت لاہور میں سموگ سے نمٹنے کے لیے متحدہ عرب امارات کی حکومت کی جانب سے مصنوعی بارش کا کامیاب تجربہ مکمل کر لیا گیا ہے۔

لاہور کے شہریوں کی مشکلات دور کرنے کے لیے متحدہ عرب امارات کی حکومت نے اپنے خرچ پر مصنوعی بارش کا انتظام کیا تھا۔

متحدہ عرب امارات کے قونصل جنرل کراچی ڈاکٹر بخیت عتیق الرومیتی کا کہنا ہے کہ ’یواے ای حکومت اور عوام پاکستانی بھاٸیوں کی ہر ممکن مدد کو اپنا فرض سمجھتے ہیں۔‘

’یو اے ای حکومت پاکستانی معیشت میں استحکام کے ساتھ ساتھ ہر معاملے میں تعاون کر رہی ہے۔‘

لاہور میں مصنوعی بارش کے کامیاب تجربے پر صوبائی حکومت کی جانب سے متحدہ عرب امارات حکومت کا خصوصی طور پر شکریہ ادا کیا گیا ہے۔

صوباٸی حکومت کا کہنا ہے کہ لاہور میں کامیاب تجربے کے بعد دیگر صوبوں میں بھی یو اے ای حکومت کی خدمات حاصل کی جاٸیں گی۔