احتساب عدالت نے نواز شریف کے اثاثے واپس کرنے کا حکم دے دیا

اسلام آباد کی احتساب عدالت نے توشہ خانہ کیس میں سابق وزیراعظم نواز شریف کی جائیداد ضبطگی کے احکامات واپس لیتے ہوئے جائیداد اور اثاثے واپس کرنے کا حکم دے دیا ہے۔

احتساب عدالت کے جج محمد بشیر نے توشہ خانہ ریفرنس میں سابق وزیراعظم نواز شریف کو 2020 میں اشتہاری قرار دیا تھا۔

عدالت نے نواز شریف کے اثاثے ضبط کرنے کے احکامات بھی جاری کیے تھے۔

احتساب عدالت نے لاہور میں 1650 کنال سے زائد زرعی اراضی، مرسیڈیز اور لینڈ کروزر گاڑیاں نواز شریف کو واپس لوٹانے کا حکم دیا ہے۔

عدالت نے نواز شریف کے منجمد کیے گئے بینک اکاؤنٹس بھی بحال کرنے کا حکم دیا ہے۔

واضح رہے کہ رواں سال اکتوبر میں نواز شریف نے وطن واپس آکر خود کو عدالت کے سامنے سرنڈر کیا تھا۔

یاد رہے کہ توشہ خانہ ریفرنس میں احتساب عدالت نے اکتوبر 2020 میں سابق وزیراعظم نواز شریف کو اشتہاری قرار دینے کے بعد ان کی جائیداد ضبط کرنے کے احکامات جاری کیے تھے۔

عدالتی فیصلے کے بعد لاہور میں مسلم لیگ ن کے قائد نواز شریف کی 1650 کنال سے زائد زرعی اراضی اور گاڑیاں ضبط کر لی گئی تھیں۔