Getty Images
کرکٹ ورلڈ کپ 2023 کے باقاعدہ آغاز سے قبل انڈیا کے شہر حیدر آباد میں نیوزی لینڈ کے خلاف وارم اپ میچ میں اگرچہ پاکستان کو ایک بڑا ہدف دینے کے باوجود پانچ وکٹوں سے شکست کا سامنا کرنا پڑا ہے
پاکستان نے پہلے بیٹنگ کرتے ہوئے پانچ وکٹوں کے نقصان پر 345 رنز بنائے لیکن نیوزی لینڈ نے مطلوبہ ہدف اپنے بلے بازوں کی جارحانہ بیٹنگ کی بدولت 44ویں اوور میں ہی حاصل کر لیا۔
اس میچ کے بعد جہاں پاکستانی بولروں کی کارکردگی پر ایک بڑا سوالیہ نشان لگا ہے وہیں بلے بازی کے شعبے میں پاکستان کی جانب سے ’وائلڈ کارڈ انٹری‘ کے طور پر ٹیم میں شامل کیے جانے والے سعود شکیل نے جو کھیل پیش کیا اُسے دیکھ کر پاکستانی شائقین کی ٹیم کے مڈل آرڈر سے اُمیدیں ضرور وابستہ ہو گئی ہیں۔
ایشیا کپ میں جانے سے پہلے پاکستان کے لیے جو سب سے بڑی پریشانی کی بات تھی وہ یہ تھی کہ پاکستانی ٹیم کا مڈل آرڈر اس بڑے ٹورنامنٹ میں پرفارم کر پائے گا کہ نہیں۔
لیکن ورلڈ کپ کے پہلے وارم اپ میچ میں پاکستان کی بیٹنگ دیکھنے کے بعد کچھ نہ کچھ پریشانی تو ضرور دور ہوئی۔ سعود شکیل کی 53 گیندوں پر پانچ چوکوں اور چار چھکوں کی مدد سے 75 رنز کی اننگز کے بعد اُن کا نام ایکس (سابقہ ٹوئٹر) پر ٹرینڈ کرتا دکھائی دے رہا ہے۔
کراچی سے تعلق رکھنے والے سعود شکیل نے اپنے ون ڈے کریئر کا آغاز اگرچہ 2021 میں انگلینڈ کے خلاف کارڈف میں کھیلے گئے میچ سے کیا تھا لیکن وہ دو برس سے زیادہ عرصے میں صرف چھ میچوں میں ہی پاکستان کی نمائندگی کر سکے ہیں۔
رواں برس نیوزی لینڈ کے خلاف ہونے والی سیریز میں بھی وہ ٹیم کا حصہ نہیں تھے تاہم سری لنکا کے خلاف ٹیسٹ سیریز میں انھوں نے عمدہ پرفارمنس کا مظاہرہ کیا تھا۔
حال ہی میں ہونے والے ایشیا کپ میں بھی آخری وقت میں ان کا نام سکواڈ میں شامل کیا گیا مگر وہ کوئی میچ نہ کھیل سکے۔ ایشیا کپ میں سری لنکا کے خلاف ہونے والے آخری میچ میں انھیں پلیئنگ الیون کا حصہ بنایا گیا تھا مگر بیمار ہونے کی وجہ سے وہ یہ میچ بھی نہ کھیل سکے۔
تاہم وارم اپ میچ میں ان کی پرفارمنس کے بعد کرکٹ شائقین ان کے مداح نظر آتے ہیں۔
’سعود شکیل کرکٹ ورلڈ کپ کے لیے ہماری جانب سے ایک سرپرائز ہے‘
عاطف نواز نامی صارف نے 53 گیندوں پر 75 رنز کی ان کی شاندار اننگز کی تعریف کرتے ہوئے لکھا کہ ’سعود شکیل کی ایک متاثر کن اور دلکش اننگز۔ سعود کے جانب سے اننگز کے اختتام پر کھیلے جانے والے کچھ سٹروکس بہت عمدہ تھے۔ ان کی اونچی ڈرائیوز، اور جارحانہ بلے بازی کو دیکھنا انتہائی خوشگوار تھا، اب مجھے یقین ہے کہ وہ پاکستان کے لیے پلیئنگ الیون میں شامل ہوں گے۔‘
https://twitter.com/AatifNawaz/status/1707739166887256141?t=LNbagaTBiKClQGH4ctnVEA&s=19
حمزہ شہباز نامی صارف نے لکھا کہ ’سعود شکیل کرکٹ ورلڈ کپ کے لیے ہماری جانب سے ایک سرپرائز ہے، اور انھیں پاکستانی سکواڈ میں شامل کرنا ایک بہترین فیصلہ ہے۔‘
https://twitter.com/hamxashahbax21/status/1707736583431168244?t=uaNYdyHGb9S6Codugrlqqg&s=08
پاکستان کی جانب سے نیوزی لینڈ کے خلاف ہونے والے اس وارم آپ میچ میں پاکستانی وکٹ کیپر محمد رضوان نے بھی 94 گیندوں کا سامنا کرتے ہوئے 103 رنز کی شاندار انگز کھیلی، مگر اُنھوں نے اننگز مکمل ہونے کے بعد انٹرویو میں اپنی اننگز کو تو رکھا ایک جانب مگر بات کی سعود شکیل کی بیٹنگ کی۔
رضوان نے کہا کہ ’سعود شکیل نے شاندار فارم کا مظاہرہ کیا اور شاندار پرفارمنس دی۔ ون ڈے فارمیٹ میں ’سٹینڈ آؤٹ کھلاڑی‘ کے طور پر ان کی صلاحیت کا اندازہ لگانا دلچسپ ہے۔‘
https://twitter.com/iMShami_/status/1707748648174633305?t=577yRwb6CRyykJFULogLNg&s=08
’ینگ یو‘ نامی صارف نے بھی سعود شکیل کی دو انتہائی شاندار سٹروک کھیلتے ہوئے تصاویر شیئر کیں اور لکھا ’سعود شکیل بائیں ہاتھ سے بلے بازی کرنے والے بابر ہیں، ان کے چھکے انتہائی خوبصورت تھے اور کور کی جانب جو انھوں نے سٹروکس کھیلے اُن کا تو کیا ہی کہنا۔ کیا سکون تھا، کیا میں خواب تو نہیں دیکھ رہا؟‘
https://twitter.com/statpad_R/status/1707736213082325289?t=cyADxuR3-yaT0QQa__4J4A&s=08
سعود شکیل نے سپنرز اور فاسٹ بولرز دونوں کو ہی عمدہ انداز میں کھیلا اور ان کی شاندار اننگز کے باعث پاکستان نیوزی لینڈ کو ایک اچھا ہدف دینے میں کامیاب ہوا، مگر کیا کریے پاکستانی بولرز کا!
سعود شکیل وہ پہلے پاکستانی بلے باز ہیں جنھوں نے اسی سال سری لنکا کے خلاف ہوم گراؤنڈ پر ڈبل سنچری بنائی تھی۔ ان کے ٹیسٹ کریئر کی اگر بات کریں تو وہ اب تک ہر ٹیسٹ میچ میں کم از کم ہر اننگز میں نصف سنچری یا اس سے زیادہ رنز سکور کر چکے ہیں۔ فی الحال ان کی بیٹنگ اوسط 98.5 کی ہے۔
سعود شکیل نے فرسٹ کلاس کرکٹ میں بھی رنز کے انبار لگائے ہیں۔ 65 فرسٹ کلاس میچوں میں انھوں نے 16 سنچریوں اور 23 نصف سنچریوں کی مدد سے 4844 رنز بنائے ہیں۔ فرسٹ کلاس کرکٹ میں ان کا ٹاپ سکور 187 تھا۔
28 برس کے سعود شکیل اب تک چھ ایک روزہ میچز کھیل چُکے ہیں جن میں اُن کا سٹرائیک ریٹ 71.02 ہے اور اُن کا بہترین سکور 56 گیندوں پر 76 رنز ہے۔
اضافی رپورٹنگ: محمد صہیب