کینیڈا کے وزیراعظم جسٹن ٹروڈو کی توقعات کے برعکس امریکی وزیر خارجہ انٹونی بلنکن نے اپنے انڈین ہم منصب جے شنکر سے ملاقات میں بظاہر سکھ رہنما ہردیپ سنگھ نجر کے قتل کا معاملہ نہیں اٹھایا۔خبر رساں ادارے روئٹرز کے مطابق وزیراعظم جسٹن ٹروڈو نے اس یقین کا اظہار کیا تھا کہ انٹونی بلنکن انڈین وزیر خارجہ سے ملاقات میں اس معاملے پر بھی بات کریں گے تاہم امریکی محکمہ خارجہ کی جانب سے جاری اعلامیے میں اس کا کوئی ذکر نہیں ہے۔کینیڈا کے وزیراعظم جسٹن ٹروڈو نے کہا تھا کہ ان کے پاس انڈیا کے سِکھ رہنما ہردیپ سنگھ کے قتل میں ملوث ہونے کی ’مصدقہ معلومات‘ موجود ہیں جس کے کچھ دنوں بعد قتل کی ایک سی سی ٹی وی فوٹیج بھی منظر عام پر آئی۔کینییڈا کی توقعات کے باوجود اتحادی ممالک بشمول امریکہ اس معاملے پر احتیاط برتتے دکھائی دے رہے ہیں۔امریکی اور انڈین وزرائے خارجہ کے درمیان واشنگٹن میں ہونے والی ملاقات کے بعد امریکی محکمہ خارجہ کی جانب سے جاری اعلامیے میں کہا گیا ہے کہ دونوں رہنماؤں نے انڈیا کی جی ٹوئنٹی صدارت، انڈیا مشرق وسطیٰ یورپ کوریڈور، دفاعی شعبے، خلا اور صاف توانائی سے متعلق معاملات پر گفتگو کی۔اس اعلامیے مییں کہیں بھی کینیڈا میں سکھو رہنما کا قتل یا انڈیا کے ساتھ جاری کشیدگی کا ذکر نہیں کیا گیا۔سیاسی تجزیہ کاروں کے مطابق اس کی ایک وجہ یہ ہے کہ واشنگٹن سمیت دیگر اتحادی ممالک انڈیا کو چین کے بڑھتے ہوئے اثر و رسوخ کا مقابلہ کرنے کے متحمل سمجھتے ہیں۔جمعرات کو انٹونی بلنکن کی جے شنکر سے واشنگٹن میں ہونے والی ملاقات کے متعلق جب وزیراعظم جسٹن ٹروڈو سے پوچھا گیا تو ان کا کہنا تھا کہ ’امریکی یقیناً یہ معاملہ انڈین حکومت کے ساتھ اٹھائیں گے۔‘ہردیپ سنگ کو کینیڈا کے صوبے برٹش کولمبیا میں نامعلوم افراد نے قتل کر دیا تھا۔ فوٹو: روئٹرزکینیڈا کے وزیراعظم جسٹن ٹروڈو نے رواں ماہ کی 18 تاریخ کو پارلیمنٹ میں خطاب کرتے ہوئے سکھ رہنما کے قتل کا الزام انڈیا پر عائد کیا تھا۔ ان کا کہنا تھا کہ ان کے پاس ’مصدقہ معلومات‘ موجود ہیں کہ سِکھ رہنما ہردیپ سنگھ کے قتل میں انڈیا کے ملوث ہے۔بعد ازاں کینیڈا نے ایک انڈین سفارت کار کو ملک بدر کر دیا جس کے جواب میں انڈیا نے بھی ایک کینیڈین سفارت کار کو ملک بدر کرنے کا اعلان کیا۔یاد رہے کہ کینیڈا میں ممتاز سکھ رہنما ہردیپ سنگھ نجار کو رواں برس 18 جون کو کینیڈا کے صوبے برٹش کولمبیا کے شہر سرے میں نامعلوم افراد نے فائرنگ کر کے قتل کر دیا تھا۔46 سالہ ہردیپ سنگھ نجار 2007 میں انڈیا سے کینیڈا منتقل ہوگئے تھے، وہ انڈیا میں سکھوں کی علیحدگی پسند تحریک ’خالصتان‘ کی حامی شاخ سے وابستہ تھے۔ انڈیا کی نیشنل انویسٹی گیشن ایجنسی نے ہردیپ سنگھ نجار کو دہشت گرد قرر دے کر ان کے سر کی قیمت 10 لاکھ روپے مقرر کر رکھی تھی۔