کراچی کی مقامی عدالت میں مقدے کی سماعت کے دوران ملزم نے جج کو جوتا دے مارا، موقع پر فلمی سین جیسا ماحول بن گیا، جج نے ملزم کو سزا سنادی۔
ماڈل کرمنل ٹرائل کورٹ ضلع وسطی کے ایڈیشنل ڈسٹرکٹ اینڈ سیشن جج عبدالحفیظ لاشاری کی عدالت میں منشیات کیس کے ملزم نے جوتا جج کو دے مارا لیکن خوش قسمتی سے جوتا جج کو نہیں لگا۔
ملزم نے جوتا جج کی جانب اچھالنے کے بعد کہا کہ اب مجھے سزا دو۔ عدالت نے ملزم کے اس اقدام پر سخت برہمی کا اظہار کیا اور ملزم تسلیم کو 6ماہ قید کی سزا سنادی، ملزم پر ایک ہزار روپے جرمانہ بھی عائد کیا گیا۔
یاد رہے کہ سیاستدانوں کو جوتے مارنے کا سلسلہ بہت پرانا ہے، امریکا کے سابق صدر جارج بش کے علاوہ پاکستان کے کئی سیاستدان جوتا کلب کا حصہ ہیں۔
پاکستان کی عدالتوں میں ملزمان کی جانب سے ججوں کے ساتھ بد تمیزی اور دھمکیوں کے واقعات بھی اکثر دیکھنے میں آتے ہیں، کئی بار وکلاکی طرف سے ججوں کے ساتھ مارپیٹ کے واقعات بھی سامنے آتے ہیں۔
کراچی کی مقامی عدالت میں ملزم کی طرف سے جج کو جوتا مارنے کے حوالےسے خبر کی وجہ سے عدالتوں میں انتہائی تشویش کی لہر پائی جارہی ہے۔