راجا ریاض کی لندن میں نواز شریف سے ملاقات، مسلم لیگ ن میں شمولیت کا اعلان

سابق اپوزیشن لیڈر اور تحریک انصاف کے سابق رکن قومی اسمبلی راجا ریاض احمد پاکستان مسلم لیگ ن میں شامل ہو گئے ہیں۔

راجا ریاض نے لندن میں سابق وزیراعظم نواز شریف اور مسلم لیگ ن کے صدر شہباز شریف سے ملاقات کے دوران پارٹی میں شمولیت کا اعلان کیا۔

مسلم لیگ ن کی جانب سے سنیچر کو جاری کیے گئے بیان کے مطابق ’راجا ریاض نے ملاقات میں نواز شریف کی قیادت پر بھرپور اعتماد کا اظہار کیا۔‘

اس موقع پر سینیٹر اسحاق ڈار، میاں ناصر جنجوعہ، عطا اللہ تارڑ، ملک محإد احمد خان، اعظم نذیر تارڑ اور امجد پرویز بھی موجود تھے۔

یاد رہے کہ راجا ریاض 2018 کے انتخابات میں تحریک انصاف کے ٹکٹ پر فیصل آباد سے رکن قومی اسمبلی منتخب ہوئے تھے۔

انہوں نے سابق وزیراعظم عمران خان کے خلاف تحریک عدم اعتماد کے دوران ان کے خلاف ووٹ دیا تھا اور بعدازاں پارٹی کے منحرف ارکان کے گروپ کی مدد سے اپوزیشن لیڈر بن گئے تھے۔

راجا ریاض نے کئی ٹاک شوز میں کہا تھا کہ ’وہ آئندہ الیکشن پاکستان مسلم لیگ ن کے ٹکٹ پر لڑیں گے۔‘