پاکستان اور سری لنکا میں جاری ایشیا کپ کے دوران ایک نئی بحث جنم لینے لگی ہے جس میں کرکٹ شائقین کو اس بات پر تعجب ہو رہا ہے کہ ٹیموں کی آفیشل جرسی (شرٹس) پر میزبان ملک پاکستان کا نام کیوں نہیں لکھا ہوا۔عمومی طور پر جب کوئی انٹرنیشنل ٹورنامنٹ ہوتا ہے تو اُس میں ٹیموں کی شرٹس پر ایک جانب اُس ٹورنامنٹ کا لوگو اور پھر اُس ٹورنامنٹ کے میزبان ملک کا نام لکھا ہوا ہوتا ہے تاہم اس مرتبہ ایشیا کپ میں ٹیموں کی جرسی پر صرف ایشیا کپ کا لوگو ہی بنا ہوا ہے۔اس بارے میں پاکستانی میڈیا نے دعویٰ کیا ہے کہ ایشین کرکٹ کونسل (اے سی سی) نے گزشتہ برس اس بات کا فیصلہ کیا تھا کہ مستقبل میں ہونے والے ایونٹس میں ٹیموں کی جرسی پر صرف لوگو ہی بنایا جائے گا جبکہ اُن پر میزبان ملک کا نام اور سال درج نہیں ہوگا۔ اے سی سی نے یہ فیصلہ اس وجہ سے کیا تھا کہ گزشتہ برس متحدہ عرب امارات (یو اے ای) میں کھیلے گئے ایشیا کپ کا میزبان ملک سری لنکا تھا تاہم وہاں معاشی بحران کے باعث ایونٹ کو یو اے ای منتقل کرنا پڑا۔اُس ایوںٹ میں کچھ شرٹس پر سری لنکا اور کچھ پر یو اے ای لکھا ہوا تھا جس کے باعث اے سی سی نے شرٹس سے میزبان ملک کا نام ہٹانے کا فیصلہ کیا تاکہ تمام ٹیموں کی شرٹس یکساں ہوں۔یہاں واضح رہے جاری ایشیا کپ کی آفیشل میزبانی پاکستان کے پاس ہے جبکہ سری لنکا میں میچ انڈین کرکٹ ٹیم کے پاکستان نہ آنے کی وجہ سے کھیلے جا رہے ہیں۔