پاکستان مسلم لیگ (ق) کے سربراہ چودھری شجاعت حسین نے تحریک انصاف کے مرکزی صدر و سابق وزیراعلیٰ چودھری پرویزالٰہی سے جیل میں ملاقات کی۔
پرویز الٰہی کے صاحبزادے راسخ الٰہی اور ان کی فیملی نے بھی ان سے ملاقات کی جو ایک گھنٹہ جاری رہی، سابق وزیر اعلیٰ چودھری پرویز الٰہی کی عدالت میں پیشی سے قبل مسلم لیگ (ق) کے سربراہ چودھری شجاعت حسین نے جیل میں جا کر پرویز الٰہی سے ملاقات کی، یہ ان کی پرویزالٰہی سے تیسری ملاقات تھی۔
نجی ٹی وی کے مطابق بتایا گیا ہے کہ ملاقات میں سیاسی صورتحال اور خصوصاًخاندان میں واپسی کے حوالے سے گفتگو کی گئی،چودھری پرویز الٰہی پی ٹی آئی چھوڑنے کو تیار ہیں لیکن مونس الٰہی نہیں مان رہے ہیں۔
چودھری پرویزالٰہی کے ذرائع کے مطابق خاندانی معاملات کی وجہ سے مونس الٰہی ہی اعلان کریں تو بہتر ہے،ذرائع کے مطابق چودھری شجاعت حسین اور پرویز الٰہی کی ملاقات کے دوران مونس الٰہی سے فون پر رابطے کی کوشش بھی کی گئی تاہم رابطہ نہیں ہو سکا۔