وفاقی وزیر برائے بین الصوبائی رابطہ احسان مزاری نے پاکستان کرکٹ بورڈ (پی سی بی) کو خبردار کرتے ہوئے کہا ہے کہ ایشیا کپ کی طرح پاکستان کو بھی غیر جانبدار وینیو کی درخواست کرنے کا حق حاصل ہے۔
اپنے ایک حالیہ بیان میں انہوں نے انٹرنیشنل کرکٹ کونسل (آئی سی سی) ورلڈکپ 2023 میں پاکستان کی شمولیت سے متعلق اظہار خیال کیا۔ انہوں نے کہا کہ پاکستان ایشیا کپ کا میزبان ہے اور تمام میچز کروانے کا حق رکھتا ہے۔ کرکٹ کے شائقین یہی چاہتے ہیں کہ ہمیں ایشیا کپ کا ہائبرڈ ماڈل منظور نہیں۔
احسان مزاری نے بھارتی کرکٹ بورڈ (بی سی سی آئی) کو ورلڈکپ وینیوز سے متعلق وارننگ جاری کی۔ انہوں نے کہا کہ ایشیا کپ کی طرح اپنائے گئے ہائبرڈ ماڈل کے تحت پاکستان کو بھی غیر جانبدار مقام کی درخواست کرنے کا حق حاصل ہے۔
وفاقی وزیر کا کہنا تھا کہ پی سی بی میری وزارت کے ماتحت آتا ہے۔ اگر بھارت اپنے ایشیا کپ کے میچز کسی غیر جانبدار مقام پر کھیلنے کا مطالبہ کرسکتا ہے تو ہم بھارت میں ہونے والے ورلڈکپ کیلئے بھی یہی مطالبہ کریں گے۔