سابق صدر آصف زرداری نے کہا ہے کہ 5 جولائی پاکستان کی سیاسی تاریخ کا سیاہ ترین دن ہے،5 جولائی 1977 کو پاکستان کو اندھیرے کی طرف دھکیلا گیا جس کا خمیازہ آج تک پاکستان بھگت رہا ہے ۔
5 جولائی یوم سیاہ کے موقع پراپنے پیغام میں سابق صدر نے کہا کہ 5 جولائی کو آئین شکن ٹولے نے اقتدار کی لالچ میں قوم سے آئین کا نور چھین لیا تھا ۔ اقتدار کے لالچی ٹولے نے وطن کی آزادی، خودمختاری اور خودداری کو پامال کیا۔
انہوں نے مزید کہا کہ ذوالفقار علی بھٹو شہید نے باوقار اور ایٹمی پاکستان کی تعمیر کی تھی،بھٹو شہید کی قیادت میں پاکستان تیزی سے ترقی کی منزلیں طے کر رہا تھا۔
خیال رہے کہ پیپلز پارٹی ذوالفقار علی بھٹو کی حکومت کا تختہ الٹنے کے دن کو یوم سیاہ کی طور پر منارہی ہے۔