قصابوں کی جانب سے 12 جولائی تک دکانیں بند رکھنے کا اعلان کیا گیا ہے، 13 جولائی سے جانور ذبح کرکے بڑا اور چھوٹا گوشت فروخت کیا جائے گا۔
مٹن بیف قصاب ایسوسی ایشن کی طرف سے عید الاضحیٰ کی وجہ سے 12 جولائی تک دکانیں بند رکھنے کا اعلان کیا گیا ہے۔ 13 جولائی سے معمول کے مطابق گوشت فروخت کیا جائے گا۔
قصابوں کا کہنا ہے کہ اس عرصے میں قربانی کے جانوروں کے پائے اور سری شہریوں کو تیار کرکے دیے جارہے ہیں۔ بیل کے پائے تیار کرنے کا معاوضہ 1200 روپے جبکہ مغز نکال کر دینے کا معاوضہ 250 روپے تک لیا جارہا ہے۔
عید الاضحیٰ گزرنے کے بعد بھی شہریوں کی بڑی تعداد قیمہ، سری اور پائے تیار کروانے کیلئے ان قصابوں کے پاس آرہی ہے۔ زیادہ تر رش بڑے پائے تیار کرنے والے قصابوں کی دکانوں پر ہے۔
خیال رہے کہ قصابوں کی دکانیں بند رہنے کے اعلان کے بعد سے ملک بھر میں مرغی کے گوشت کی قیمت میں اضافہ دیکھنے کو ملا ہے۔ مرغی کی فی کلو قیمت 900 روپے تک پہنچ گئی ہے۔
ہم نیوز کے مطابق کراچی میں مرغی کا ہڈی کے بغیر گوشت 1400 روپے فی کلو تک جا پہنچا ہے۔ دوسری طرف اسلام آباد میں مرغی کے گوشت کی فی کلو قیمت 850 روپے تک پہنچ گئی ہے۔ اسی طرح لاہور میں چکن 800 روپے فی کلو میں دستیاب ہے۔