وزیر مملکت برائے پٹرولیم مصدق ملک نے کہا ہے کہ غریب صارفین کیلئے پٹرولیم مصنوعات پر سبسڈی سکیم پر عملدرآمد وقتی طور پر روک دیا گیا ہے ۔
تفصیلات کے مطابق پریس کانفرنس کرتے ہوئے ان کا کہنا تھا کہ ایک اچھی سکیم تھی۔غریب کو سہولت دینا اور امیر سے پیسے لینے میں کوئی حرج نہیں ہے۔
اس سلسلہ میں وقتی طور پر عملدرآمد روکا گیا ہے۔سکیم پر تمام متعلقہ فریقین کو مطمئن کریں گے۔
ایک سوال کے جواب میں مصدق ملک نے کہا کہ جب عالمی سطح پر تیل کی قیمتیں کم ہوتی ہیں تو عوام کو ریلیف دیا جاتا ہے، پٹرولیم مصنوعات کی قیمتوں میں کمی کی گئی ہے۔
موجودہ حکومت کے دور میں کوئی گیس کنکشن نہیں دیا گیا، ملک میں گیس کے ذخائر کم ہو رہے ہیں، روس سے تیل درآمد کیا جا رہا ہے اور ہم بین الحکومتی معاہدے کر رہے ہیں۔
پچھلی حکومت صرف باتیں کرتی رہی، عملی طور پر کچھ نہیں تھا، ہم نے چار ماہ میں معاہدہ کر لیا ہے، اس سے تیل کی قیمت کم ہو گی، عوام کو سہولت دی جائے گی۔
جلد ہی نئی ریفائنری پالیسی کا اعلان ہو گا، 10 سے 14 ارب ڈالر کی لاگت سے نئی ریفائنری قائم کی جائے گی، ہم نے موسم سرما میں 20 سے 30 ہزار ٹن اضافی ایل پی جی منگوائی تاکہ اس کی ملک میں کمی نہ ہو۔
جامع انرجی سکیورٹی پر کام ہو رہا ہے اور اس سلسلہ میں جلد ایک منصوبہ شروع کیا جائے گا۔