واشنگٹن: عالمی مالیاتی فنڈ (آئی ایم ایف) کے پاکستان کے لیے مشن چیف ناتھن پورٹر نے کہا ہے کہ ضروری فنانسنگ اور معاہدوں کی حتمی شکل اختیار کرنے کے بعد آئی ایم ایف نے پاکستانی حکام کے ساتھ مل کر نویں ریویو کو مکمل کرنے پر کام جاری رکھا ہوا ہے۔
برطانوی خبر رساں ایجنسی ’روئٹرز‘ کے مطابق پاکستانی حکام کے ساتھ بیل آؤٹ پروگرام کے لیے نویں ریویو کو مکمل کرنے پر جو کام ہو رہا ہے اس کے تحت ملک کو ایک ارب دس کروڑ ڈالرز جاری کیے جائیں گے۔
مشن چیف ناتھن پورٹر کے مطابق آئی ایم ایف اگلے مالی سال کے بجٹ کی تیاری کے لیے تکنیکی کام سمیت پاکستانی حکام کو پالیسیوں پر عمل درآمد کرانے میں مدد کر رہا ہے۔
واضح رہے کہ آئندہ مالی سال کا بجٹ پاکستان کی قومی اسمبلی سے ماہ جون کے اواخر تک منظور کرایا جائے گا۔
میڈیا رپورٹ کے مطابق اس حوالے سے طے شدہ شرائط کے تحت پاکستان نے اس بات کی یقین دہانی کرائی ہے کہ جون میں ختم ہونے والے رواں مالی سال میں اس کی ادائیگیوں کے توازن کے فرق کو دو طرفہ اور کثیر الجہتی فنانسنگ سے فنڈز فراہم کیے جائیں گے۔
پیٹرول سبسڈی سکیم، حکومت آئی ایم ایف کے سامنے ڈٹ گئی
یاد رہے کہ وزیراعظم میاں شہباز شریف نے کہا تھا کہ دوست ممالک کی جانب سے مالی معاونت کے وعدے کیے گئے ہیں۔