سوڈان میں پھنسے پاکستانیوں کے انخلا کا آپریشن کامیابی سے جاری ہے اور پاکستان کی ایئرفورس کا ایک اور طیارہ مزید 96 شہریوں کو لے کر کراچی پہنچا ہے۔سنیچر کی صبح پاکستان کی فضائیہ کی جانب سے جاری کیے گئے ایک بیان کے مطابق ’پاک فضائیہ نے اپریل کے وسط سے مسلح تصادم کی وجہ سے تباہ حالی کے شکار سوڈان سے پاکستانیوں کے انخلاء کا تیسرا مشن کامیابی کے ساتھ مکمل کر لیا ہے۔‘بیان کے مطابق پاک فضائیہ کا سی-130 طیارہ سوڈان سے مزید 96 پھنسے ہوئے پاکستانیوں کو لے کر واپس کراچی پہنچا۔اس طرح تنازع زدہ علاقے سے ایئرلفٹ کیے جانے والے پاکستانیوں کی تعداد 355 ہو گئی ہے۔بیان میں کہا گیا ہے کہ ’سربراہ پاک فضائیہ، ایئر چیف مارشل ظہیر احمد بابر سدھو کی ہدایت پر پی اے ایف کا ٹرانسپورٹ جہازوں کا بیڑہ مکمل پیشہ ورانہ مہارت اور اپنے پاکستانی بھائیوں اور بہنوں کو فوری طور پر بحفاظت پہنچانے کے عزم سے لبریز انخلاء کے مشنوں کو کامیابی سے انجام دے رہا ہے۔‘ایئرفورس کے مطابق ’پاک فضائیہ کے سوڈان سے پاکستانیوں کے انخلاء کے کامیاب مشن کو حکومت پاکستان اور عوام نے بے حد سراہا ہے۔‘خیال رہے کہ سعودی عرب دنیا بھر کے شہریوں کو سوڈان سے نکالنے کے لیے سفارتی ذرائع استعمال کر رہا ہے اور اب تک 80 ملکوں کے تین ہزار سے زائد باشندوں کو بحری اور فضائی راستوں سے بحفاظت مملکت پہنچا چکا ہے۔