اسلام آباد پولیس نے طیبہ گُل انکوائری کیس میں سابق وزیراعظم عمران خان، ان کے سابق پرنسپل سیکرٹری اعظم خان اور سابق چیئرمین نیب جسٹس (ر) جاوید اقبال کو دوبارہ طلبی کے نوٹس جاری کر دیے ہیں۔ترجمان اسلام آباد پولیس نے جمعے کو ایک ٹویٹ میں بتایا کہ عمران خان، اعظم خان اور جسٹس (ر) جاوید اقبال کو 14 اپریل کو انکوائری افسر کے سامنے پیش ہونے کا حکم جاری کیا گیا ہے۔بیان میں کہا گیا ہے کہ ’انکوائری کمیٹی کے افسر نے جائے وقوعہ کا بھی دورہ کیا، انکوائری افسران تمام مقامات سے ثبوت جمع کریں گے جہاں طیبہ گل کو محبوس رکھا گیا۔‘ترجمان کے مطابق احتساب عدالت ون لاہور کے جج راؤ عبدالجبار صاحب نے انکوائری افسران کو 18 اپریل کو طلب کر رکھا ہے۔ آئی جی پنجاب اور آئی جی اسلام آباد کو انکوائری افسر مقرر کیا ہوا ہے۔‘طیبہ گل نامی خاتون کا نام 2019 میں اُس وقت سامنے آیا تھا جب سابق چیئرمین نیب جسٹس ریٹائرڈ جاوید اقبال کے خلاف ایک مبینہ ویڈیو سوشل میڈیا پر وائرل ہوئی تھی۔طیبہ گل کیس انکوائری ۔
عمران خان ، اعظم خان اور جسٹس ریٹائرڈ جاوید اقبال کو دوبارہ نوٹس جاری۔
دوبارہ موقع فراہم کرتے ہوئے 14 اپریل کو انکوائری افسر کے سامنے پیش ہونے کا حکم۔
انکوائری افسر نے جائے وقوعہ کا دورہ کیا۔
— Islamabad Police (@ICT_Police) April 13, 2023
اس ویڈیو کے منظر عام پر آنے کے بعد جسٹس (ر) جاوید اقبال سے استعفے کا مطالبہ بھی زور پکڑنے لگا تھا تاہم انھوں نے تمام الزامات مسترد کر دیے تھے۔بعدازاں وفاقی پارلیمان کی پبلک اکاونٹس کمیٹی (پی اے سی) کے ایک اجلاس میں طیبہ گل نے الزام عائد کیا تھا کہ سابق چیئرمین نیب جسٹس ریٹائرڈ جاوید اقبال نے انھیں متعدد مواقع پر ہراساں کیا۔ جاوید اقبال سے اُن کی ملاقات اُس وقت ہوئی جب وہ لاپتہ افراد کے لیے قائم کمیشن کے سربراہ تھے۔طیبہ گل نے سابق وزیراعظم عمران خان پر وزیراعظم ہاؤس میں انہیں حبس بے جا میں رکھے جانے سے متعلق الزامات لگائے تھے۔انہوں نے الزام لگایا کہ انہیں تحریک انصاف حکومت کے دوران وزیراعظم ہاؤس میں 18 دنوں تک حبس بے جا میں رکھا گیا۔وفاقی حکومت نے گذشتہ سال ان الزامات کی تحقیقات کرانے کے لیے کمیشن بنانے کا اعلان کیا تھا۔