کئی پاکستانی مکہ مکرمہ میں کعبہ شریف کی خدمت کرنے اور موجود عمرہ زائرین کا خیال رکھنے کے فرائض سر انجام دے رہے ہیں۔ جیسا کہ یہ پاکستانی اس وقت مسجد الحرام میں عمرہ کرنے آنے والوں کو آب زم زم پلا رہا ہے۔
ہماری ویب ڈاٹ کام میں آپ کو اس پاکستانی کے بارے میں بتانے جا رہے ہیں۔
مسجدالحرام میں ایک پاکستانی کارکن قمر علی خان 18 برس سے سعودی ادارے (سقیا زمزم) سے منسلک ہیں۔ قمر علی سعودی شہر مکہ میں اسلام کے مقدس ترین مقام مسجد الحرام میں عمرہ کرنے والوں کو زمزم کا پانی پلا کر اور انہیں روزہ کھلوا کر بڑی نعمت سمجھتے ہیں۔ وہ کہتے ہیں کہ اس کے اظہار کے لیے میرے پاس الفاظ نہیں ہیں۔
قمر علی خان 18 سال سے مسجد میں مقدس پانی کی خدمت کے فرائض انجام دے رہے ہیں جس میں سال بھر میں دنیا بھر سے لاکھوں مسلمان آتے ہیں۔
قمر علی کہتے ہیں کہ زمزم ایک نعمت ہے۔ انہوں نے مزید کہا کہ جب حاجی زمزم کا پانی پیتے ہیں تو مجھ دل سے خوشی محسوس ہوتی ہے۔ حجاج کرام میرے اس کام کو سراہتے ہیں اور دعائیں دیتے ہیں۔
العربیہ چینل سے گفتگو کرتے ہوئے قمر علی خان کا کہنا تھا کہ زائرین کی خدمت کرتے ہوئے دل میں یہ خواہش رہتی ہے کہ انہیں آب زمزم پیش کریں گے تو ان کے دل سے ہمارے لیے دعائیں نکلیں گی۔
ان کا کہنا ہے کہ وہ ماہِ صیام میں غروب آفتاب کے وقت کام کرنے کو ترجیح دیتے ہیں تاکہ مسلمانوں کو افطار کے وقت پینے کے لیے مقدس پانی فراہم کر سکیں۔
ان کا کہنا تھا کہ زائرین کو آب زمزم فراہم کرنے والے ادارے سقیا زمزم کے اہلکاروں کی تعداد 650 ہے۔ واضح رہے کہ زمزم کے کنویں سے پانی کو نکالنے کے بعد اسے انتہائی جدید ترین ٹیکنالوجی کے ذریعے فلٹریشن کے عمل سے گزارا جاتا ہے۔