پاکستان سمیت تمام اسلامی ممالک میں ان دنوں رمضان کا مبارک مہینہ چل رہا ہے اور ماہرین نے 22 اپریل کو پاکستان میں عید کی پیشگوئی کی ہے تاہم سوشل میڈیا پر ایک ایسے کیلنڈر کی تصویر وائرل ہے جس میں 2077 تک کی عیدوں کی پیشگوئی کی جاچکی ہے۔
اسلامی مہینوں کا تعین چاند کی رویت کے بعد کیا جاتا ہے اور ہر ماہ کبھی 29 تو کبھی 30 ایام کا مہینہ بھی ہوتا ہے اور اسی مناسبت سے اسلامی تاریخ آگے بڑھتی ہے تاہم انگریزی کیلنڈر میں مہینوں اور دنوں کا تعین کئی سال قبل کرلیا جاتا ہے۔
پاکستان میں جہاں تک عیدوں کا تعلق ہے تو ہر سال ملک میں الگ الگ عیدیں منائی جاتی ہیں، اکثریت سرکاری رویت ہلال کمیٹی کے اعلان کے مطابق عید مناتی ہے اور کچھ علاقوں میں مقامی تنظیموں کے اعلان کے مطابق عید منائی جاتی ہے۔
اس سال مرکزی رویت ہلال کمیٹی کے اعلان کے مطابق پورے ملک میں ایک ساتھ رمضان کا آغاز کیا گیا جبکہ قوی امید ہے کہ عید کا اہتمام بھی ملک میں ایک ہی روز ہوگا۔
محکمہ موسمیات اور دیگر ماہرین فلکیات کا دعویٰ ہے کہ پاکستان میں اس سال عید الفطر ہفتہ 22 اپریل کو ہونے کا امکان ہے جبکہ سوشل میڈیا پر ایک کیلنڈر کی تصویر وائرل ہے جس میں 2023 کے علاوہ 2077 تک کی عیدوں کی تاریخوں کی بھی پیشگوئیاں کی گئی ہیں۔