چیئرمین پیپلز پارٹی بلاول بھٹو نے کہا ہے کہ جسٹس اطہر من اللہ کے نوٹ کیساتھ اب ہمارے سامنے ریکارڈ پر4 جج آچکے ہیں۔
پیپلز پارٹی کور کمیٹی کے اجلاس کے بعد گفتگو کرتے ہوئے انہوں نے کہا کہ یہ واضح ہوچکاکہ انتخابات کے انعقاد کے حوالے سے چیف جسٹس کا فیصلہ اقلیتی تھا۔
چیف جسٹس کو چاہئے کہ فی الفور بینچ فکسنگ پر مبنی لاقانونیت کو ختم کریں،یہ وہ واحد راستہ ہے کہ جس کے ذریعے سپریم کورٹ کا وقار بحال کیا جاسکتا ہے۔
3رکنی بینچ کے فیصلے کی کوئی حیثیت نہیں ہے،چیف جسٹس عدالت کے وقار کو بحال نہیں کرسکتے توکسی اور کو اپنا منصب سنبھالنے کی اجازت دیں۔
اس سے قبل آصف زرداری اور بلاول بھٹو کی زیرصدارت پیپلز پارٹی کی کور کمیٹی کا اجلاس ہوا۔
ہم نیوز کے مطابق پیپلز پارٹی کی جانب سے جاری اعلامیہ میں کہا گیا ہے کہ بات چیت کا دروازہ بند کرنا مسئلے کا حل نہیں، مذاکرات کے دروازے بند کرنا کوئی حل نہیں،مذاکرات کے معاملے پر مشترکہ موقف اختیار کیا جائے۔
اجلاس میں پیپلزپارٹی نے اتحادی حکومت میں شامل تمام جماعتوں سے رجوع کرنے کا فیصلہ کیا ،پیپلز پارٹی کی کور کمیٹی نے اکثریتی فیصلے پر عملدرآمد کا مطالبہ کیا،اکثریتی عدالتی فیصلے پر فوقیت ناقابل برداشت ہے۔
اعلامیہ میں مزید کہا گیا ہے کہ قانونی، اخلاقی اور سیاسی طور پر اس کا جائزہ لینے کی ضرورت ہے،عدلیہ کی عزت اور وقار کو مجروح نہیں ہونے دیاجائے گا۔
تمام اسمبلیوں کے بیک وقت صاف اور شفاف الیکشن ہونے چاہئیں، انتخابات کے انعقاد میں کسی قسم کی تاخیر برداشت نہیں کی جائے گی۔