پاکستان کرکٹ ٹیم کے چیف سلیکٹر ہارون رشید نے کہا ہے کہ مجھے یہ سمجھ نہیں آرہا کہ سلیکشن کمیٹی کسی کھلاڑی سے رابطہ کیوں کرے گی؟ ہمارا دروازہ ہر کسی کیلئے کھلا ہے۔
میڈیا سے گفتگو کرتے ہوئے قومی ٹیم کے چیف سلیکٹر نے سابق فاسٹ باولر محمد عامر کی انٹرنیشنل ٹیم میں واپسی سے متعلق سوال کا جواب دیا۔ انہوں نے کہا کہ ہم نے پہلے دن آکر چیئرمین پاکستان کرکٹ بورڈ (پی سی بی) نجم سیٹھی کے ساتھ پریس کانفرنس کرتے ہوئے کہا تھا کہ ہمارے دروازے سب کے لیے کھلے ہیں۔
ہارون رشید کا کہنا تھا کہ آپ پروفیشنل ہیں، ساری دنیا کی لیگز کھیلتے ہیں۔ یہ کھلاڑیوں پر منحصر ہے کہ وہ کس طرح کھیلتے ہیں اور اپنی کارکردگی دکھاتے ہیں۔ اس کے بعد ہمارا کام ہے کھلاڑیوں کو پرکھنے کا۔ ہم کسی سے رابطہ کیوں کریں گے؟
خیال رہے کہ گزشتہ دنوں محمد عامر کے حوالے سے یہ خبریں گردش کررہی تھیں کہ ممبر سلیکشن کمیٹی نے کہا ہے کہ پی سی بی چاہتا ہے کہ محمد عامر انٹرنیشنل کرکٹ میں واپس آئیں۔ محمد عامر کو سلیکشن کمیٹی اور پی سی بی کا پیغام دے دیں کہ وہ کسی بھی بیان بازی سے گریز کریں۔
خبروں میں یہ بھی کہا گیا تھا کہ ممبر سلیکشن کمیٹی کی جانب سے محمد عامر کو پیغام دیا گیا ہے کہ وہ اپنی واپسی پر توجہ دیں اور پریکٹس کو یقینی بنائیں۔ محمد عامر کو جب پی سی بی کہے تو فوری ریٹائرمنٹ واپس لے لیں۔