لاہور کی انسداد دہشتگری کی خصوصی عدالت نے جلاؤ گھیراؤ سمیت تین مقدمات میں سابق وزیراعظم عمران خان کی عبوری ضمانت میں 13 اپریل تک توسیع کر دی ہے۔منگل کو انسداد دہشتگری کی خصوصی عدالت کی ڈیوٹی جج عبہر گل نے جلاؤ گھیراؤ سمیت تین مقدمات میں عمران خان کی حاضری معافی کی درخواست پر سماعت کی۔عدالت نے حاضری معافی کی درخواست مسترد کرتے ہوئے عمران خان کو آج 11 بجے طلب کیا تھا۔عمران خان کے خلاف تھانہ ریس کورس میں تین مقدمات درج ہیں جن میں پی ٹی آئی کارکن ظل شاہ کی موت، جلاؤ گھیراؤ اور کارِ سرکار میں مداخلت کے مقدمات درج ہیں۔دوران سماعت چیئرمین تحریک انصاف کے وکیل نے موقف اپنایا کہ عمران خان کو شدید سکیورٹی خطرات لاحق ہیں۔عدالت نے استفسار کیا کہ ’آپ صرف یہ بتائیں کہ عمران خان عدالت میں پیش ہوں گے یا نہیں؟‘ جس پر اُنہوں نے بتایا کہ ’ہمیں ڈیڑھ بجے کا وقت دیں عمران خان پیش ہو جائیں گے۔‘جج نے ریمارکس دیے کہ ’جو عدالت میں آئے گا اس کو ریلیف ملے گا۔ اگر عمران خان پیش ہوئے تو ٹھیک ورنہ قانون کے مطابق فیصلہ کر دیں گے۔‘چیئرمین تحریک انصاف عمران خان عدالتی حکم پر زمان پارک سے انسداد دہشتگردی کی عدالت پہنچے۔عدالت نے تینوں مقدمات میں سابق وزیراعظم کی عبوری ضمانت 13 اپریل تک منظور کر لی۔انسداد دہشت گردی عدالت نے تحریک انصاف کے چیئرمین عمران خان کی تین مقدمات میں چار اپریل تک عبوری ضمانت منظور کی تھی۔