پاکستان کے وفاقی وزیر قانون اعظم نذیر تارڑ نے کہا ہے کہ ’الیکشن کمیشن کے فیصلے کی ٹھوس وجوہات ہیں۔ پورے ملک میں بیک وقت انتخاب سے استحکام آئے گا۔‘وزیر قانون اعظم نذیر تارڑ نے جمعرات کو اسلام آباد میں پریس کانفرنس کرتے ہوئے کہا کہ ’انتخابات بیک وقت ہونے میں ہی ملک کا بھلا ہے ۔ اسی سے ملک میں سیاسی و معاشی استحکام آئے گا۔‘’الیکشن کمیشن نے جو فیصلہ کیا۔ اس کی ٹھوس وجوہات ہیں۔ آئین کا آرٹیکل 224 کہتا ہے کہ الیکشن ایک ہی دن ہونا چاہیے۔ اس کی ایک شق کو باقی کے ساتھ ملا کر پڑھنا چاہیے۔‘انہوں نے عمران خان کی جانب اشارہ کرتے ہوئے کہا کہ ’ایک شخص کی انا کی بھینٹ دو اسمبلیاں چڑھ گئیں۔‘’اب اگر دو صوبوں میں انتخابات ہو جاتے ہیں۔ تو جب وہاں قومی اسمبلی کے انتخابات ہوں گے تو وہاں سیاسی حکومتیں ہوں گی۔‘’الیکشن کمیشن کو غیرجانبدارانہ انتخاب کے لیے نگراں سیٹ اپ چاہیے ہوتے ہیں۔ اس کے علاوہ سکیورٹی کے مسائل بھی ہیں۔‘وزیر قانون نے کہا کہ ’دوسری بات یہ ہے کہ مردم شماری کے نتائج چند ہفتوں میں آ جائیں گے۔ اب اگر دو صوبوں میں پرانی مردم شماری پر الیکشن ہوں اور پھر قومی اسمبلی کے انتخابات نئی مردم شماری پر ہوں تو ایک اور کنفیوژن پیدا ہو جائے گی۔‘’پاکستان میں سیاسی استحکام کے لیے بیک وقت انتخابات ہی آپشن ہے۔ انتخابات کو حصوں بخروں میں کرانے کی بات کو چھوڑ کر اس جانب بڑھا جائے۔‘’سب سے بڑا مسئلہ سکیورٹی کا ہے۔ سکیورٹی اداروں کا کہنا ہے کہ ہم سرحدوں پر دہشت گردی کے خلاف مصروف ہیں۔ مردم شماری میں بھی ڈیوٹی دے رہے ہیں۔ اب ایک ماہ کے لیے فوج کو کیسے تعینات کیا جا سکتا ہے۔‘’ان حالات میں اگر دو صوبوں میں الیکشن ہوں گے تو وہ خونی الیکشن ہوں گے۔‘اعظم نذیر تارڑ نے کہا کہ ’ہم بات چیت کی حمایت کرتے ہیں۔ عمران خان نے صاحب نے اپنے دور حکومت میں ایک بار بھی اپوزیشن لیڈر کے ساتھ ہاتھ نہیں ملایا۔ اب میں نے سنا ہے کہ وہ اس کے لیے تیار ہیں۔ یہ اچھا ہے۔ وہ اپنے نمائندے بھیجیں تو ہم بھی بیٹھ جائیں گے۔‘’میں سمجھتا ہوں گرینڈ نیشنل ڈائیلاگ ہونا چاہیے۔ ایک ٹُرتھ اینڈ ری کنسلیشن پروسس ہونا چاہیے۔‘