میں کمزور نہیں،استعفیٰ نہیں دوں گا، وزیراعلیٰ بلوچستان

وزیراعلیٰ بلوچستان میرعبدالقدوس بزنجو نے کہا ہے کہ میں کمزور نہیں،استعفیٰ نہیں دوں گا،نکال دیا تو اور بات ہے۔

میڈیا سے گفتگو کرتے ہوئے انہوں نے کہا کہ ہم سب نے مل کر بلوچستان کی ترقی کیلئے باپ پارٹی بنائی، باپ پارٹی راتوں رات نہیں بنی، اس پارٹی سے جانے والا اپنے ووٹ لےکر جاتا ہے۔

انہوں نے کہا کہ ووٹرز دن رات محنت کر کے ہمیں اقتدار تک پہنچاتے ہیں، کارکن کے پارٹی سے جانے پر بہت بڑا نقصان ہوتا ہے۔

ان کا کہنا تھا کہ کافی روز سے سوچ رہا تھا کرسی پر رہوں گا یا نہیں؟ مشکلات کا سامنا کروں گا ،ہمت نہیں ہاروں گا۔

انہوں نے کہا کہ غلط فیصلے ہوتے ہیں موجودہ نظام کے تحت ایسے فیصلے کرنا پڑتے ہیں،تمام مسائل کا ملبہ صرف سیاستدانوں پر ڈالا جاتا ہے، ہوسکتاہےکہ آئندہ الیکشن نہ لڑوں۔