آج کا دور جدید ہے اور انسان اپنی عقل اور مہارت کے بلبوتے پر کئی ایسی چیزیں دریافت کرنے لگا ہے کہ جس کو دیکھ کر کافی حیرانگی ہوتی ہے۔
سوشل میڈیا پر ایسے متعدد پیجز کی بھرمارہے جس میں روز مرہ استعمال کرنے والی چیزوں سے آسان ہیکنگ ٹپس بتائی جاتی ہیں جو آپ نے کبھی نہیں سوچی ہوتیں۔
آج ہم آپ کے ساتھ فریج سے متعلق ایک ایسی آسان ٹپ شئیر کرنے جا رہےہیں جو کہ آپ کی زندگی میں آسانی پیدا کر سکتی ہے۔
اکثر ہمارے گھروں میں بعض اوقات بجلی جانے کی وجہ سے فریج کئی گھنٹے کے لئے بند ہو جاتا ہے اور اس میں رکھے کھانے خراب ہونے کا خدشہ پیدا ہو جاتا ہے، خاص طور پر فریزر میں رکھی وہ اشیاء جنہیں ایک بار غیر منجمد ہونے کے بعد دوبارہ فریز نہیں کرنا چاہیے۔
اگر تو آپ گھر پر ہی ہیں تو کوئی بڑے مسئلے کی بات نہیں لیکن اگر آپ سارا دن باہر گزار کر گھر واپس آتے ہیں تو کیسے پتا چلے گا کہ فریج چند گھنٹوں کے لئے بند تو نہیں رہا، یعنی فریزر میں رکھی اشیاء غیر منجمد ہونے کے بعد دوبارہ فریز تو نہیں ہو رہیں؟ یہ جاننے کے لیے کوئی جدید ٹیکنالوجی کی ضرورت نہیں ہے بلکہ اس کے لیے ایک سکہ ہی کافی ہے۔
یہ سادہ ٹیکنالوجی کچھ اس طرح ہے کہ ایک پیالے میں پانی ڈال کر اسے فریزر میں رکھ دیجئے اور جب یہ برف بن چکا ہو تو اس کے اوپر ایک سکہ رکھ دیجئے۔ اسے فریزر میں رکھ چھوڑیں۔ اب آپ جب ضرورت ہو اسے چیک کر سکتے ہیں۔
اگر سکہ برف کے اوپر ہی پڑا ہے تو سب ٹھیک ہے لیکن اگر یہ نیچے بیٹھ چکا ہے تو اس کا مطلب ہے کہ فریج کافی گھنٹے بند رہی ہے جس کے باعث برف پگھلی اور سکہ نیچے چلا گیا۔
اس صورت میں آپ کو وہ کھانے باہر نکال دینے چاہئیں جنہیں دوبارہ فریز کر کے استعمال کرنا مناسب نہیں۔