پاکستان کے معروف اداکار و گلوکار اور میوزک کمپوزر علی ظفر نے کے ٹو سر کرنے کے دوران لاپتہ ہونے والے پاکستانی کوہ پیما محمد علی سدپارہ کو انوکھے انداز سے خراج تحسین پیش کر دیا ہے۔
علی ظفر نے مشہور گانا تم چلے آؤ پہاڑوں کی قسم نئے انداز سے کمپوز کیا ہے اور اسے اپنی آواز میں گا کر علی سدپارہ کو خراج تحسین پیش کر کے خوبصورت پیغام دیا کہ بس اب تم چلے آؤ۔
پشتو دھن پر بنائے جانے والے گانے کی ویڈیو میں علی ظفر نے پہاڑی مناظر دکھائے اور اسے منفرد انداز سے پیش کرتے ہوئے پاکستان کے ہیرو کو خراج تحسین پیش کیا۔
صارفین نے علی ظفر کی اس کاوش کو بے پناہ سراہا ہے۔
خیال رہے کے ٹو مہم جوئی کے دوران لاپتہ ہونے کے بعد علی سدپارہ کی اسی گانے پر رقص کی ویڈیو سوشل میڈیا پر وائرل ہوئی تھی جس میں اُن کے پہاڑوں سے عشق کو دکھایا گیا تھا۔
ویڈیو میں علی سد پارہ اپنے دیگر ساتھیوں کے ساتھ خیمے میں موجود تھے اور وہ یہ گانا خود گن گناتے ہوئے مخصوص انداز میں رقص کر رہے تھے۔
واضح رہے کہ دنیا کے دوسرے بلند ترین پہاڑ کے ٹو کو سردیوں میں سر کرنے کی مہم پر نکلنے والی علی سدپارہ اور دو غیرملکی کوہ پیما لاپتہ ہوگئے تھے، اُن کی گمشدگی کو دس روز سے زائد دن گزر چکے ہیں۔