آپ نے اکثر مرنے والوں کے قریبی لوگوں سے سنا ہو گا کہ مرحوم مرنے سے قبل اس قسم کی باتیں کر رہا تھا یا وہ اس چیز کا ذکر کر رہا تھا جو اسے دکھائی دے رہی تھی۔
ایسا ہی کچھ نیویارک سے تعلق رکھنے والے 88 سالہ بیمار شخص کے ساتھ ہوا جسے موت سے چند دن پہلے ایک رات انتہائی واضح اور حیران کن خواب نظر آیا، جس میں وہ کسی نامعلوم مقام پر ڈرائیونگ کر رہا ہوتا ہے اور اسے اپنی مرحوم ماں کی آواز سنائی دیتی ہے کہ’’سب ٹھیک ہے، تم ایک اچھے بچے ہو، مجھے تم سے محبت ہے‘‘۔
اس مریض جیسے تجربات زندگی کے آخری ایام میں بہت زیادہ عام ہیں اور بیشتر افراد کو حیران کن خواب اور ایسی چیزیں نظر آتی ہیں، جو اْن کے اندر موت کا ڈر کم کرنے میں مددگار ثابت ہوتی ہیں۔ یہ دعویٰ امریکا میں ہونے والی ایک نئی طبی تحقیق میں سامنے آیا ہے۔
سینٹر فار ہوسپلسی اینڈ پالیاٹیو کیئر center for hospice and palliative care میں یہ بات سامنے آئی کہ زندگی کے اختتام پر خواب اور مختلف تصورات موت کا قدرتی حصہ ہیں اور ایسے خواب اکثر سکون بخش، حقیقت پسندانہ ہوتے ہیں۔
تحقیق کے دوران زیادہ تر قریب المرگ مریضوں نے ایسے خوابوں کے تجربات کا ذکر کیا اور انہوں نے اسے بہت گہرا قرار دیا۔
لیکن یہاں ایک اور بات بھی قابل ذکر ہے کہ محققین کے مطابق یہ موت کے عمل کا نظروں سے اوجھل پہلو ہے۔ تحقیق کے دوران محققین نے 75 سال یا اس سے زائد عمر کے مریضوں سے بات چیت کی جو کہ آئی سی یو میں زیر علاج تھے اور ان سے ان کے خوابوں یا تصورات کے بارے میں معلوم کیا گیا۔
محققین کا کہنا ہے کہ زندگی کے اختتام کے قریب حیران کن خوابوں یا حقیقت جیسے مناظر نظر آنے کے بارے میں صدیوں سے مرحومین کے قریبی رشتے دار یا نگہداشت کرنے والے بتاتے رہے ہیں۔
ماہرین نے کہا کہ ہماری تحقیق میں پہلی بار براہ راست مریضوں سے بات کرکے ان کی زندگی کے آخری ہفتوں یا مہینوں پر بات کی گئی تا کہ حقیقت جانی جا سکے۔
موصول ہونے والے نتائج سے پتہ چلا کہ 88 فیصد مریضوں نے کم از کم ایک خواب کا ذکر کیا، جن میں وہ موت کی جانب بڑھ رہے یا خود کو مرا ہوا دیکھ رہے تھے۔ یہ تجربہ ذاتی طور پر معنی خیز اور جذباتی طور پر اطمینان بخش ہوتا ہے، جو کہ مریضوں کو بالکل حقیقی لگتا ہے حالانکہ ایسا منظر وہ اکثر خواب میں دیکھتے ہیں۔
محققین نے بتایا کہ بیشتر افراد کو ایسے خوابوں یا کھلی آنکھوں سے تصور میں مرحوم رشتہ دار اور دوست نظر آتے ہیں جبکہ کئی بار زندہ افراد بھی ان کے ساتھ ہوتے ہیں۔ ان کے بقول’’مرحوم افراد کو دیکھنا ذہنی طور پر زیادہ اطمینان بخش ثابت ہوتا ہے، خاص طور پر موت کا وقت قریب آنے پر ان مرحوم پیاروں کا نظر آنا بہت زیادہ ہو جاتا ہے، جو لوگوں کو ذہنی طور پر آخری وقت کے لیے تیار کرنے میں مدد دیتا ہے۔