بچوں کو کہانیاں سننے کا بے حد شوق ہوتا ہے۔ بچپن میں سونے سے قبل چھوٹے بچوں کو نانی، دادی مختلف کہانیاں سنایا کرتی تھیں جس کے بعد وہ پرسکون نیند سوجاتے تھے۔
ایک عام خیال ہے کہ کہانیاں سنانے سے بچے جلد نیند کی وادی میں اتر جاتے ہیں اور پرسکون نیند سوتے ہیں، تاہم اب ماہرین نے اس کے ایک اور پہلو کی طرف عندیہ دیا ہے۔ ماہرین کے مطابق رات سونے سے قبل سنائی جانے والی کہانیاں بچوں کی ذہنی صلاحیت میں اضافہ کرتی ہیں۔
جرنل آرکائیوز آف ڈیزیز ان چائلڈ ہڈ نامی میگزین میں شائع ہونے والی ایک تحقیق سے معلوم ہوا ہے کہ کہانیاں بچے میں سوچنے کی صلاحیت کو بہتر کرتی ہیں جبکہ ان کی یادداشت اور سیکھنے کی صلاحیت میں بھی اضافہ ہوتا ہے۔ ماہرین کا کہنا ہے کہ رات میں کہانیاں سننے سے بچے مختلف تصورات قائم کرتے ہیں، یہ عادت آگے چل کر ان کی تخلیقی صلاحیتوں کو ابھارنے میں مثبت کردار ادا کرتی ہے۔
علاوہ ازیں بچوں کے ذخیرہ الفاظ میں اضافہ ہوتا ہے جبکہ ان کی زبان بھی بہتر ہوتی جاتی ہے۔ تحقیق میں بتایا گیا کہ کہانیاں سننے کے برعکس جو بچے رات سونے سے قبل ٹی وی دیکھنے کے عادی ہوتے ہیں، یا پھر اسمارٹ فون، کمپیوٹر یا ویڈیوز گیمز کھیلتے ہیں انہیں سونے میں مشکلات درپیش ہوتی ہیں۔
سونے سے قبل مختلف ٹی وی پروگرامز دیکھنے والے بچے نیند میں ڈراؤنے خواب بھی دیکھتے ہیں۔ ماہرین کا مزید کہنا ہے کہ رات سونے سے قبل بچے کے ساتھ وقت گزارنا بچوں اور والدین کے مابین تعلقات مضوط بناتا ہے۔