ٹرین کی تصویریں بھی لیں اور آرام دہ سفر بھی طے کیا۔۔۔ قونصل جنرل جاپان کا کراچی سرکلر ٹرین پر سفر کیسا رہا؟ دیکھیں کچھ تصاویر

قونصل جنرل جاپان توشی کازو ایسومورا نے کراچی میں چلائی جانے والی سرکلر ریلوے سروس کا دورہ کیا۔

توشی کازو ایسومورا نے ٹرین پر سفر کیا اور سالوں بعد کے سی آر کا پہیہ چلنے پر اپنی خوشی کا اظہار کیا۔

توشی کازو ایسومورا 4 سال سے زائد عرصے سے کراچی میں قونصل جنرل جاپان تعینات ہیں، اگر ہم یہ کہیں کہ وہ کئی دہائیوں سے پاکستان میں ہیں تو غلط نہ ہوگا۔ وہ یہاں کے معاشرتی، سیاسی اور معاشی امور پر گہری نظر رکھتے ہیں۔

جاپانی سفارت کار کو اردو زبان میں کافی دلچسپی اور عبور حاصل ہے، یہ شہر کے دیگر معاملات کے ساتھ ساتھ کراچی سرکلر ریلوے کے منصوبے میں گہری دلچسپی لے رہے ہیں۔

سفارتکار گزشتہ شام کراچی سٹی ریلوے اسٹیشن پہنچے اور ٹکٹ کاؤنٹر سے شام 5 بجے روانگی کے لئے تیار لوکل ٹرین کا ٹکٹ خریدا۔ پھر ریلوے ٹکٹ کلکٹر سے ٹرین کے بارے میں معلومات حاصل کیں اور پلیٹ فارم پر کھڑی سرکلر ٹرین کا معائنہ کیا۔

انہوں نے ٹرین کی تصویریں بھی بنائیں، ٹرین کے انجن کی تصویر بناتے ہوئے انہیں ٹرین کی روانگی کا وقت ہونے کا احساس ہوا تو وہ جلدی سے ٹرین میں سوار ہوگئے۔

ٹرین 2 منٹ تاخیر سے شام 5 بجکر 2 منٹ پر سٹی اسٹیشن سے روانہ ہوئی۔ انہوں نے ٹرین کا واش روم بھی استعمال کیا۔

جاپانی قونصل نے کے سی آر چلانے کی پاکستان ریلوے کی کوششوں کو سراہا۔ انہوں نے کہا کہ ''کئی دہائیوں سے بند کراچی سرکلر ٹرین چل پڑی ہے، یہ دیکھ کر بے انتہا خوشی ہوئی ہے چونکہ انفرا اسٹرکچر مکمل ہوئے بغیر ہی ٹرین چلائی گئی ہے اس لئے منصوبے میں ابھی کچھ خامیاں ہیں''۔