کراچی سمیت سندھ کے مختلف علاقوں میں آج تیز بارش کی پیشن گوئی۔۔۔ شہر میں بارشوں کا سلسلہ کب تک جاری رہے گا؟ جانیں

محکمہ موسمیات کی جانب سے کراچی سمیت سندھ کے مختلف علاقوں میں آج بروز جمعہ کو تیز بارش کی پیشگوئی کردی گئی ہے۔

محکمہ موسمیات کے ڈائریکٹر عبدالقیوم بھٹو کا اس حوالے سے کہنا ہے کہ 'شہرِ قائد میں آج شام سے بارش کا آغاز ہو سکتا ہے جبکہ 20 سے 30 ملی میٹر تک بارش ہونا متوقع ہے'۔

ڈائریکٹر محکمہ موسمیات کے مطابق بروز ہفتہ اور اتوار کو کراچی میں بارش کی شدت زیادہ ہوگی اور شہر میں 40 سے 50 ملی میٹر سے زائد بارش ہونے کا امکان ہے جبکہ نشیبی علاقوں میں اربن فلڈنگ کا بھی خطرہ ہے۔

تاہم ہوا کے کم دباؤ کا سسٹم مزید آگے بڑھنے پر بارش کی شدت میں اضافہ ہو سکتا ہے اور بارش 70 سے 80 ملی میٹر تک بھی جا سکتی ہے۔

واضح رہے شہرِ قائد میں بارشوں کا سلسلہ پیر تک جاری رہنے کا امکان ہے۔