سندھ حکومت کا نیا منصوبہ: کراچی میں کیا بننے جا رہا ہے؟ جانیں دلچسپ و اہم معلومات

کراچی میں ایک نیا منصوبہ بنایا جا رہا ہے جس کے افتتاح کا جلد ہی امکان ہے۔

تفصیلات کے مطابق سندھ حکومت کے ترجمان بیرسٹر مرتضیٰ وہاب نے اس حوالے سے بتایا ہے کہ سندھ حکومت کا ایک اور منصوبہ تیار ہے جس کو پیپلز اسکوائر کا نام دیا گیا ہے۔ منصوبہ قدیم عمارتوں اور علاقوں کے وسط میں بنایا گیا ہے، یہ منصوبہ عالمی بینک کے اشتراک سے تعمیر کیا گیا ہے۔

مرتضٰی وہاب نے بتایا کہ منصوبے میں پارکنگ پلازا بھی تعمیر کیا گیا ہے، پارکنگ ایریا میں 350 گاڑیوں اور250 موٹر سائیکلوں کے کھڑے کرنے کی سہولت موجود ہوگی۔

تاہم دو ہزار افراد بیک وقت اس خوبصورت تفریحی مقام پر آسکتے ہیں، پیپلزاسکوائر کی دلچسپ بات یہ ہے کہ اس کی 50 فیصد دوکانیں خواتین کے لئے مختص ہیں، منصوبے کے تحت اطراف کی عمارتوں کی مرمت اور لائٹنگ کی گئی جبکہ اطراف کی سڑکوں کی مرمت بھی کی گئی ہے۔

ترجمان سند حکومت نے یہ واضح کیا ہے کہ پیپلز اسکوائر منصوبہ ڈیڑھ ارب روپے کی لاگت سے تعمیر کیا گیا ہے، جبکہ 2 سے 3 روز میں منصوبے کا افتتاح ہوگا۔