بلیو سپر مون: پاکستان سمیت دنیا کے کئی ملکوں میں چاند سُرخ کیوں ہوا؟

اتوار اور پیر کی شب ہماری زمین کے گرد چکر لگانے والا چاند ڈرامائی انداز میں مکمل طور پر سرخ ہو گیا تھا۔

یہ چمکتا ہوا گول چاند برطانیہ بھر میں اتوار کو دیکھا گیا لیکن پیر کو پاکستان سمیت دنیا کے باقی ملکوں میں رہنے والوں کو بھی اس کی جھلک دیکھنے کا موقع ملا۔

پاکستان میں خلائی تحقیق کے ادارے سپارکو کے مطابق پیر کی رات 11 بج کر 26 منٹ پر ملک میں بلیو سپر مون وقوع پذیر ہوا۔

سپارکو کا کہنا ہے کہ اگلے تین سپر مون 18 ستمبر، 17 اکتوبر اور 15 نومبر کو آسمان پر نظر آئیں گے۔

یہ بلیو سپر مون سرخ کیوں ہے؟

اگرچہ اسے بلیو مون پکارا جاتا ہے مگر یہ چاند درحقیقت نیلا نہیں ہے۔

برطانوی فضا میں شمالی امریکہ کے جنگلوں کی آگ کے دھویں کی موجودگی کے باعث اتوار کی رات یہ سرخ ہو گیا۔

دھوئیں کے ذرات کی موجودگی کا مطلب یہ ہے کہ فضا میں روشنی اس طرح بکھر جائے کہ نارنجی اور سرخ رنگ عام حالات کے مقابلے میں زیادہ واضح دکھائی دینے لگیں۔

دھوئیں کا مطلب یہ بھی ہے کہ آسمان دھندلا ہو گیا تھا اور اتوار کی رات کو غروب آفتاب کے ساتھ ہی نارنجی رنگ آسمان پر چھا گیا تھا۔

لیکن برطانیہ میں آسمان جلد ہی دھوئیں کے ذرات سے صاف ہو جائے گا کیونکہ بارشوں کی پیش گوئی ہے اور آسمان پر نظر رکھنے والوں یا سکائی واچرز پیر کی رات کو نایاب بلیو سپر مون کا نظارہ کر پائیں گے۔

چونکہ زمین کے گرد چاند کا قمری چکر 29.5 دن کا ہوتا ہے لہذا یہ ہمارے کیلنڈر کے ساتھ مطابقت نہیں رکھتا جہاں عام دنوں میں مہینے میں ایک پورا چاند ہوتا ہے۔

بلیو مون اس وقت ممکن ہوتا ہے جب ہمیں سال میں ایک اضافی 13واں چاند ملتا ہے۔

اس طرح ایک مہینے میں دوسرا پورا چاند ’بلیو مون‘ بن جاتا ہے۔

تاہم اس بلیو مون کی ایک اور وضاحت یہ بھی ہے کہ چاند کے زمین کے گرد چکر کے نتیجے میں کسی بھی موسم میں چار نہیں بلکہ تین پورے چاند ہوتے ہیں۔

لہذا جہاں عام طور پر ہر موسم میں تین پورے چاند ہوتے ہیں تو جب ان کی تعداد چار ہو جائے تو اس صورت میں تیسرے پورے چاند کو بلیو مون کا درجہ دیا جاتا ہے۔

چونکہ بلیو مون اتنے عام نہیں، اسی لیے یہ جملہ ’ونس اِن بلیو مون‘ وجود میں آیا، یعنی وہ رات جو بہت کم آتی ہے۔

اس پورے چاند کو ’سپر مون‘ بھی کہا جاتا ہے۔

سُپر مون میں ’سُپر‘ اس بات کی جانب اشارہ ہے کہ یہ آسمان میں بڑا نظر آیا۔ جب چاند زمین کے قریبی نقطہ پر (یا 90 فیصد کے اندر) ہوتا ہے تو یہ ’سپر مون‘ کہلاتا ہے۔

دوسرے الفاظ میں، چاند ایک کامل دائرے میں زمین کا چکر نہیں لگاتا۔ کبھی یہ قریب ہوتا ہے، کبھی تھوڑا اور کبھی دور۔

یہ رات کو آسمان میں روشن اور بڑا دکھائی دے سکتا ہے۔

اور یہ اس سال کے چار سپر مونز میں سے یہ پہلا سپر مون ہے۔

اس کے علاوہ ستمبر، اکتوبر اور نومبر بھی سپر مون دیکھے جا سکیں گے۔

بلیو سپر مون پیر کی شام برطانوی وقت کے مطابق شام سات بج کر 25 منٹ پر100 فیصد حالت میں ہو گا لیکن بہت سے لوگ اسے نہیں دیکھ پائیں گے۔

برطانیہ بھر میں بادلوں اور تیز بارشوں کی پیش گوئی ہے جو چاند ک دیکھنے کے لیے سازگار نہیں۔

تاہم رات کے کچھ اوقات میں آسمان صاف ہو سکتا ہے۔

اگرچہ بلیو سپر مون تکنیکی طور پر منگل کی رات تک مکمل نہیں ہو گا تاہم یہ مکمل ہونے کے قریب ہو گا اور امکان ہے کہ اس وقت آسمان کسی حد تک صاف ہو گا۔